جاري التحميل...
جاري التحميل...
للمبتدئين
نصائح عامة للمبتدئين ومن لديهم الشغف والرغبة فى تعلم مهارات الرماية وفنون الصيد البري
نصائح عامة للمبتدئين ومن لديهم الشغف والرغبة فى تعلم مهارات الرماية وفنون الصيد البري
إحفظ الكلمتين دول كويس جداً .. بنادق الرش عيار 4.5 و 5.5 لا يلزمها تصريح بموجب قانون الدولة (طبقاً للقرار 1030 لسنة 2020 بالتعديل الوزاري رقم 1300 لسنة 2019 والمنشور بجريدة الوقائع المصرية العدد 148 تابع / أول يوليو لسنة 2020).
لازم تتبع تعليمات الجهات الأمنية وضوابط الصيد بعدم الصيد في الأماكن السكنية أو أماكن المحميات أو المنشآت المحظور فيها الصيد، ولو أي جهة أمنية استوقفتك خليك متعاون لأقصى حد لأنهم بيشوفوا شغلهم ووضح لهم بكل أدب وذوق وهتلاقي مردود أدبك خير.
بندقية الرش مش لعبة ولابد من التعامل معها بحذر ويقظة.
دايماً شوف خلفية الرمي، واعمل حساب الطلقة لو جلَّت منك أو عدت من هدفك رايحة فين .. دايما خلفية هدفك تبص عليها أولا وتجنب الضرب على بيت أو شباك أو هدف وراه بيت أو بشر.
إصابتك لحيوان أو طير بدون فائدة زي بالضبط إصابتك للإنسان .. إرحم تُرحم.
إياك ثم إياك توجه البندقية لأي إنسان أو ممتلكات حتى لو متأكد إنها فاضية .. معظم اللي اتصابوا بالخطأ ظنوا كدة!
دايماً فوهة سلاحك موجهة للأسفل وانت ماشي وبلاش تسندها على رجلك وانت واقف أو تسند يدك على الفوهة لأن وارد جداً الزناد يفلت ويحصل ما لا يُحمد عقباه.
من أسوأ الإصابات اللي ممكن تحصل لما تكسر سبطانة البندقية (الماسورة) وتضغط على الزناد بالخطأ وهي لسة مكسورة .. ردة الماسورة في وشك هتكون دامية!
لو بندقيتك عتلة جانبية أو سفلية خد بالك من صوابعك لأن وارد يحصل للعتلة نفس اللي في البند السابق ووقتها مش هتلاقي صوابعك مكانها لا قدر الله .. خد بالك كويس.
إقرأ كويس واعرف أنواع الطيور والطرائد الحلال والمحرمة، ولو مش مسلم برضه شوف الطير بياكل إيه لأن مش أي لحم بيتاكل .. خليك نزيه في صيدك.
الصيد هواية سامية فبلاش يكون هدفك مجرد قتل وإبادة أي كائن حي .. تحلى بأخلاق الفرسان ولا تقتل إلا ما تستفيد منه أو يؤذيك أذية حقيقية.
وانت في رحلتك إعمل حسابك في سكينة صغيرة لتذكية الطريدة، ولو نزلت ميتة مش محتاجة تتذكى طالما سميت عليها وانت بتضرب .. خد بالك ان شد راس الطير لا يعتبر تذكية .. يعتبر قتل لا يحل أكله لو شديت راسه وهو عايش.
لا يجوز شرعاً وعرفاً اصطياد أي شيء مملوك للغير طالما عارف انه له صاحب حتى لو صاحبه مش شايفك .. خلي عندك أخلاق انت أكبر من كدة :).
الحمام البري اللي عايش في الأماكن البعيدة دوس براحتك فيه .. العصافير ملهاش لازمة سيبها في حالها ولو لازم براحتك هي حلال .. اليمام المستوطن والمهاجر دوس فيه براحتك.
الصرد (الدقناش) من الطيور المحرم صيدها شرعاً، الهدهد كذلك بلاش أذية.
الغراب والحداية والحية والعقرب والكلب العقور (السعران اللي عنده سُعار أو يهدد حياة البشر) حلال قتلهم في الحِل والحرم .. إقتل تؤجر.
لو بندقيتك اسبرينج بلاش تعمرها (تعشقها) وقت طويل ، خلي التعشيقة لما تتأكد من هدفك علشان الدقة والقوة تعيش معاك.
بعد ما تخلص رحلتك امسح سلاحك من التراب وبعدين امسحه بفوطة زفرة (مزيتة زيت سلاح أو مكن خياطة) علشان تتجنب الصدأ ويعيش معاك.
اتمرن كتير وإقرأ وشوف مقاطع فيديو تعليمية علشان تكتسب مهارة الرماية والتصويب بطريقة صحيحة وتقدر كمان تراعي سلاحك وتصينه بنفسك، وبلاش تيأس لو رمايتك او بندقيتك مش هي اللي على كيفك .. كل حاجة محتاجة وقت وصبر للإتقان والوصول للمراد.
واخيراً .. لو بتحب الصيد والرماية فانت من الناس المميزين .. حافظ على هوايتك وارتقي في تعاملاتك مع الناس.
خالص التحية والتقدير لكل متابعي أكاديمية فور إتش للرماية الهوائية الرياضية الأولمبية وفنون الصيد البري.
دكتور هشام الشريف
رئيس مجلس الإدارة وعضو لجنة التحكيم الدولي السابق بالاتحاد الرماية الاسيوي ومدير الرماية الهوائية الفني لنادي الظفرة الإماراتي.
ابدأ الآن
الأبطال لا يولدون يوم المنافسة، بل يُصنعون بالإعداد والانضباط والاستمرارية وساعات لا حصر لها من التدريب الصامت.
كل طلقة تُنفَّذ بثقة ودقة وانضباط هي طلقة ذهبية.
— د. هشام الشريف، رئيس مجلس إدارة أكاديمية 4H الدولية لرياضات الرماية الهوائية
